ព័ត៌មានកីឡា – Post News Cambodia

កាប្រកួតកីឡាតេក្វាន់ដូ ITF ក្រុមកម្ពុជាឈ្នះមេដាយមាស៦១គ្រឿងវ៉ាដាច់គេ

សំណព្វ — Tue, 01 Jul 2025 00:45:43 +0000

កាលពីថ្ងៃ៣០ មិថុនា ឆ្នាំ២០២៥ ព្រឹត្តិការណ៍ប្រកួតកីឡាតេក្វាន់-ដូ អាយធីអែហ្វ ជ្រើសរើសជើងឯកអាស៊ីអាគ្នេយ៍លើកទី២ ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តម កែវ រ៉េមី ទេសរដ្ឋមន្រ្តី ប្រធានសហព័ន្ធកីឡាតេក្វាន់-ដូ ITF អាស៊ីអាគ្នេយ៍ ត្រូវបានបញ្វប់ដោយជោគជ័យ ដោយក្រុមកម្ពុជា ដែលជាម្ចាស់ផ្ទះ ដណ្ដើមបានមេដាយសរុបរហូតដល់ជាង១០០គ្រឿង ដោយគ្រាន់តែមេដាយមាសទទួលបានចំនួន៦១គ្រឿង ពោលគឺនាំមុខបណ្ដាប្រទេសជាភ្ញៀវ យ៉ាងភ្លូកទឹកភ្លូកដីតែម្ដង។

ជាមួយនឹងលទ្ធផលដ៏អស្ចារ្យនេះ បានធ្វើអោយអ្នកគាំទ្រ ទាំងក្នុង និង ក្រៅស្រុក ផ្ដល់សម្រែកអបអរយ៉ាងកងរំពង ខណៈដែលតារាសិល្បករក៏បានទៅចូលរួមអបអរច្រើនដែរ ជាមួយនឹងមោទនភាពរបស់ប្រទេសមួយនេះ។ តារាជាច្រើនបានបង្ហោះអបអរ ហើយអ្នកដែលបានទៅចូលរួមនាថ្ងៃផ្ដាច់ព្រ័ត្រ ក៏បានរាំច្រៀង និង ស្រែកហ៊ោកញ្ជ្រៀវយ៉ាងកងរំពងយល់មេឃធ្លាក់ពន្លឺ ដើម្បីសាទរចំពោះក្រុមកម្ពុជា ដែលអាចធ្ចើបាន។ នេះគឺជាមុខមាត់ដ៏ធំរបស់កម្ពុជា ដែលជាម្ចាស់ផ្ទះ ហើយក្មុងនាមជាសិល្បករ ដែលបានចូលរួមអបអរ គឺមានតែសម្ដែងនូវការលើកទឹកចិត្ត និង នាំបងប្អូនកីឡាករច្រៀងរាំអោយសប្បាយៗ ក្រោយពេលប្រកាសបិទបញ្ចប់ប៉ុណ្ណោះ។

ការប្រកួតបាល់ទាត់យុវជន នៅស្វាយរៀង លេចវត្តមានសិល្បករ សិល្បការិនី គ្រួសារតារាកម្ពុជាមួយចំនួន ចូលរួមលើកទឹកចិត្ត

សំណព្វ — Fri, 16 May 2025 05:19:54 +0000

កាលពីថ្ងៃទី១៤ និង ១៥ ឧសភា ឆ្នាំ២០២៥ ឯកឧត្តម ចាប តូ អនុរដ្ឋលេខាធិកា ក្រសួងសង្គមកិច្ច និង យុវនិតិសម្បទា ជាប្រធានសមាគមតន្ត្រីសំនៀងជនពិការ បានដឹកនាំក្រុមការងារ រៀបចំកីឡាបាល់ទាត់យុវជនដណ្ដើមពានរង្វាន់ នៅខេត្តស្វាយរៀង ដោយការប្រកួតនេះ ក៏មានចូលរួមពីសិល្បករសិល្បការិនីជាច្រើនរូប មកពីគ្រួសារតារាកម្ពុជា។

លោក ផាត់ តារារដ្ឋ ចាងហ្វាងសារព័ត៌មាន ផ្ទះតារា និង លោក រុន ណាកូ ក៏បានចុះយកព័ត៌មានដោយផ្ទាល់នៅទីនោះ ដើម្បីលើកទឹកចិត្តដោយសមាគមតន្ត្រីសំនៀងជនពិការ ក្រោមការដឹកនាំរបស់ឯកឧត្តម ចាប តូ ដែលសុទ្ធសឹងតែជាជនមានពិការភាព តែបានបង្កើតសកម្មភាពកីឡា ជួយដល់ក្មេងៗអ្នកមានកាយសប្បទាគ្រប់គ្រាន់ អោយភ្លេចសកម្មភាពអបាយមុខ ដូចជាគ្រឿងញៀន និង ដើរលេងបង្ហោះម៉ូតូជាដើម។

សិល្បករដែលបានទៅលើកទឹកចិត្ត នៅទីលានការប្រកួតនោះរួមមាន អ្នកស្រី រ៉េតរ៉ូស តារាសម្ដែង. លោកជំទាវ រីយ៉ាត្រាណេ សិល្បការិនី. អ្នកនាង ទូច ស៊ីណាត តារាសម្ដែង. អ្នកស្រី សច័ន្ទ ដានី តារាសម្ដែង. លោក លី សុជន តារាសម្ដែង. លោក ប៉ូលីន ពិធីករ និង អ្នកនាង ម៉ានីតា សិល្បការិនីជាដើម។

ឯកឧត្តម ចាប តូ មានប្រសាសន៍ថា នេះជាលើកទី៣ហើយ ដែលសមាគមជនពិការ បានរៀបចំការប្រកួតបាល់ទាត់នេះឡើង ហើយនៅពេលរាត្រី ក៏មានកីឡាប្រដាល់។ ការរៀបចំនេះគឺចង់បង្ហាញអោយឃើញថា ទោះពួកលោកគឺជាជនដែលមានពិការភាព តែក៏មានលទ្ធភាពជួយសង្គម និង ជួយដល់យុវជនដែលកាយសម្បទា ដើម្បីរួមចំណែកអោយពួកគេស្រលាញ់កីឡា។ ឯកឧត្តម ក៏កោតសរសើរផងដែរចំពោះទឹកចិត្តបងប្អូនសិល្បករគ្រួសារតារាកម្ពុជា ដែលបានដឹកនាំសិល្បករ មកចូលរួមលើកទឹកចិត្តកីឡាករ និង សកម្មភាពរបស់បងប្អូនដែលមានពិការភាព ក្នុងការងារជួយដល់សង្គមមួយនេះ។ ឯកឧត្តមថា ការលះបង់របស់សិល្បករ គឺជាកម្លាំងចិត្តមួយដ៏ធំ សម្រាប់បងប្អូនកីឡាករ និង អ្នករៀបចំទាំងមូល។

ក្រុមហ៊ុនខោទឹកនោម JuJu & Pony ធ្វើអោយ ពាក់មី និង ពូចក់ ហ៊ាននិយាយបែបនេះក្នុងថ្ងៃប្រកួតបាល់ទាត់នៅព្រៃវែង

សំណព្វ — Sun, 16 Mar 2025 17:29:04 +0000

ក្នុងឱកាសប្រកួតបាល់ទាត់ នៅវិទ្យាល័យកំពង់ពពិល នៅស្រុកពារាំង ខេត្តព្រៃវែង តារាសម្ដែងលោក ពែកមី និង លោក ជីងចក់ បានកោតសរសើរចំពោះម្ចាស់ក្រុមហ៊ុនខោទឹកនោម JuJu & Pony យ៉ាងខ្លាំង ដែលបានបរិច្ចាគផ្ទាល់ខ្លួន រៀបចំការប្រកួតបាល់ទាត់រវាងក្រុមផ្ការីកគ្រប់រដូវ និង ក្រុមវិទ្យាល័យកំពង់ពពិល ហើយរៀបចំដល់ទៅ៣ប្រកួតដែលចំណាយថវិកាច្រើនទៅទៀត ដែលធ្វើអោយការប្រកួតបាល់ទាត់មួយនេះ អាចប្រព្រឹត្តិទៅបានយ៉ាងកក្រើក។ នាយពែកមី ថា បើគ្មានការជ្រោមជ្រែងពីក្រុមហ៊ុនខោទឹកនោម JuJu & Pony ការប្រកួតមួយនេះ គឺពិតជាត្រូវចំណាយច្រើន ពិសេសលើការបោះពុម្ពអាវ និង ការចំណាយផ្សេងៗ។ ក្នុងនោះការប្រកួតដែលមានដល់ទៅ៣គូ គឺរឹតតែត្រូវចំណាយច្រើន ដែលជាបន្ទុករបស់លោកដែលជាមេក្រុម។

មិនខុសគ្នាដែរ លោក ជីងចក់ បានលើកឡើងថា ការជួយជ្រោមជ្រែងរបស់ក្រុមហ៊ុន JuJu & Pony គឺជាការរួមចំណែកដ៏ធំ ក្នុងការលើកកម្ពស់ និង លើកស្ទួយវិស័យបាល់ទាត់ ហើយលោកក៏ចង់អោយក្រុមហ៊ុនមួយនេះ រួមចំណែកចូលរួមការប្រកួតរបស់ក្រុមផ្ការីកគ្រប់រដូវអោយបានច្រើន ដើម្បីជាចលករជួយជំរុញ ដល់កីឡាករ ពិសេសគឺយុវវ័យ ដែលស្រលាញ់កីឡា។

លោក រតនា នាយកទីផ្សារប្រចាំក្រុមហ៊ុន JuJu & Pony បានចាប់អារម្មណ៍ថា ក្រុមហ៊ុនពិតជាមានក្ដីសោមនស្សរីករាយយ៉ាងខ្លាំង ដែលបានចូលរួមរៀបចំការប្រកួតដ៏ធំមួយនេះ។ ក្រុមហ៊ុនក៏នឹងគម្រោងបន្តជួយលើការប្រកួតលើកក្រោយៗ និង ជួយជាប្រយោជន៍ដល់ការងារសង្គម ដើម្បីបំផុសនូវសកម្មភាពល្អៗនៅក្នុងសង្គមផងដែរ ដើម្បីជាកាដូដល់អ្នកគាំទ្រ ដែលជាអតិថិជនរបស់ក្រុមហ៊ុន ដែលចង់ឃើញក្រុមហ៊ុនចូលរួមចំណែកជួយដល់សង្គម ក្រោយពេលអាជីវកម្មជោគជ័យ។ នៅក្នុងពិធីនោះ ក្រុមហ៊ុនក៏បានបោះពុម្ពអាវកីឡាចំនួន២០០អាវ ចែកជូនដល់ក្មេងៗផងដែរ ដើម្បីបំផុសអោយយុវវ័យ ស្រលាញ់កីឡា។

ថ្ងៃបើកពិធីការប្រកួតកីឡារាំ ប្រធានសហព័ន្ធកីឡារាំកម្ពុជាលើកឡើងបែបនេះថា…

សំណព្វ — Sun, 03 Nov 2024 00:33:32 +0000

នៅក្នុងពិធីបើកការប្រកួតកីឡារាំកម្ពុជា កាលពីថ្ងៃទី២ វិច្ឆិកា ឆ្នាំ២០២៤ ក្រោមអធិបតី ឯកឧត្តម ខៀវ កាញារីទ្ធ ឧត្តមប្រឹក្សាផ្ទាល់ព្រះមហាក្សត្រ និង ជាប្រធានកិត្តិយសសហព័ន្ធកីឡារាំកម្ពុជា លោកជំទាវ ញ៉ែម មរកត ប្រធានសហព័ន្ធ បានថ្លែងប្រាប់លោក ផាត់ តារារដ្ឋ ស្ថាបនិកគ្រួសារតារាកម្ពុជា ដែលទើបតែត្រូវបានតែងតាំងជា អនុប្រធានកិត្តិយសសហព័ន្ធកីឡារាំកម្ពុជាថា លោកជំទាវសូមអំពាវអោយ គ្រប់មជ្ឈដ្ឋាន ជាពិសេសគឺសប្បុរសជន សូមអោយជួយជ្រោមជ្រែងដល់កីឡាករកីឡាការិនីរាំ ដើម្បីអោយមានលទ្ធភាពបានទិញសំលៀកបំពាក់សម្រាប់ចូលប្រកួត ដោយសារតែសំលៀកបំពាក់មួយឈុតៗ របស់កីឡាករកីឡាការិនីគឺថ្លៃៗ ដែលធ្វើអោយអ្នកចូលរួមប្រកួត ប្រឈមការខ្វះខាត។

លោកជំទាវប្រធានបញ្ជាក់ថា សំលៀកបំពាក់របស់កីឡាកររាំទាំងអស់ មិនអាចកាត់ ឬកែច្នៃដោយខ្លួនឯងទេ គឺលុះត្រាតែកុម្ម៉ង់ទិញពីអន្តរជាតិ ដែលភាគច្រើនគឺមានតម្លៃខ្ពស់។ លោកជំទាវអះអាងថា កីឡារាំ ត្បិតតែត្រូវបានរៀបចំដោយសហព័ន្ធកីឡារាំកម្ពុជា និង សុទ្ធតែជាកីឡាកររបស់កម្ពុជា តែគណកម្មការដាក់ពិន្ទុ គឺសុទ្ធតែមកពីអន្តរជាតិ ដោយមានគណកម្មមកពីវៀតណាម តៃវ៉ាន់ និង ជនជាតិផ្សេង។ សូម្បីតែគ្រូបង្វឹក ក៏ជាជនជាតិរុស្ស៊ី និង ជាអ្នកជំនាញមកពីបរទេស។ ជាមួយគ្នានោះ លោកជំទាវ ក៏បង្ហាញពីកង្វះខាតកីឡាករចូលរួមហ្វឹកហាត់ផងដែរ ដោយស្នើអោយជួយផ្សព្វផ្សាយ អោយយុវវ័យចុះឈ្មោះចូលហាត់អោយបានច្រើន ដើម្បីបណ្ថុះធនធានកីឡាករអោយមានចំនួនច្រើន ស្មើនឹងចំនួនកីឡាការិនី ដែលមានកំណើន។

លោកជំទាវថា កង្វល់របស់សហព័ន្ធសព្វថ្ងៃ គឺខ្វះអ្នកហាត់ជាបុរស ខ្វះលទ្ធភាពជួយកីឡាករកីឡាការិនីអោយមានសមត្ថភាពទិញឈុតដែលកំណត់ដោយគណកម្មការអន្តរជាតិ និង មួយទៀតគឺខ្វះថវិកាស្ពុនស័រកីឡាករកីឡាការិនី ពេលត្រូវចេញប្រកួតក្រៅប្រទេស។ យ៉ាងណាមិញ មកទល់ពេលនេះ កីឡារាំកម្ពុជាមានការរីកចំរើនខ្លាំងជាងមុន ដោយក្នុងអណ្ណត្តិដែលលោកជំទាវដឹកនាំ កីឡាករកីឡាការិនីច្រើនណាស់ បានចេញប្រកួតអន្តរជាតិ ហើយបានឈ្នះមេដាយកម្រិតពិភពលោក ដែលធ្វើអោយកីឡារាំកម្ពុជា មានការទទួលស្គាល់។

លោកជំទាវ ញ៉ែម មរកត បន្តថា រយៈពេលចុងក្រោយនេះ សហព័ន្ធបានសម្រេចតែងតាំងបុគ្គលដែលមានសក្កានុពលកាន់តែច្រើន អោយក្លាយជាប្រធានកិត្តិយស និងជាអនុប្រធានកិត្តិយស ដើម្បីអោយជួយទ្រទ្រង់សហព័ន្ធ ក៏ដូចជាផ្សព្វផ្សាយពីសកម្មភាពសហព័ន្ធ ដោយលោកជំទាវរំពឹងថា កីឡារាំកម្ពុជា នឹងផ្ទុះការចាប់អារម្មណ៍ ហើយទទួលបានការជ្រោមជ្រែងកាន់តែខ្លាំង។ លោក ផាត់ តារារដ្ឋ ស្ថាបនិកគ្រួសារតារាកម្ពុជា ដែលបានដឹកនាំសិល្បករចូលរួម ក៏បានសន្យាផងដែរថា នឹងជួយបំផុស ផ្សព្វផ្សាយ និង ពាំនាំការអំពាវនាវរបស់លោកជំទាវ នៅលើបណ្ដាញសង្គម តាមតែអាចធ្វើទៅបាន ដើម្បីជួយពង្រីកសកម្មភាពរបស់សហព័ន្ធ ក្នុងនាមជាអ្នកជួយផ្សព្វផ្សាយមួយរូប។

សហព័ន្ធកីឡាបេស្បបល ហ្វាយ ប្រកាសបើកពិធីប្រកួតផ្លូវការ

សំណព្វ — Wed, 21 Aug 2024 03:39:39 +0000

កាលពីព្រឹកថ្ងៃទី ២០ ខែ សីហា ឆ្នាំ ២០២៤ មុននេះ សហព័ន្ធកីឡាបេស្បបល សុហ្វបលកម្ពុជា- Cambodia Baseball Softball Federation បានរៀបចំធ្វើពិធីសន្និសីទសារព័ត៌មាន ស្ដីអំពីការបើកព្រឹត្តិការណ៍បហរកួត កីឡាបេស្បបល លីគ កម្ពុជា លើកទី១ ដែលនឹងប្រព្រឹត្តិឡើងចាប់ពីថ្ងៃទី ២២-២៣ និង ២៤ ខែ សីហា ឆាប់ៗខាងមុខនេះ។

នៅក្នុងថ្ងៃសន្និសីទប្រកាសបើកកម្មវិធីនេះផងដែរក៏មានការចូលរួមពីសំណាក់ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំយុវជន និង កីឡា ចូលរួមជាគណអធិបតី ព្រមទាំងវត្តមានដៃគូ Sponsor ជាច្រើនចូលរួមជាកិត្តិយស និង ដើម្បីជាសក្ខីភាពនៃការចុះកិច្ចកុងត្រាសហការបន្ថែមជាមួយនឹងក្រុមហ៊ុនដែលជាអ្នកឧបត្ថម ហើយក៏ដូចជាផ្ដល់នូវវេទិកាកិច្ចសម្ភាសន៍ខ្លះៗអំពីដំណើរការ និង ដំណឹងការចូលរួមរបស់កម្មវិធីប្រកួត Basketball5 League នៅឯពហុកីឡដ្ឋានជាតិអូឡាំពិក បន្ទាប់ពីការចាប់ឆ្នោតរើសក្រុមប្រកួតជាផ្លូវការមុខបណ្ដារអ្នកសារព័ត៌មាន និង ភ្ញៀវកិត្តិយស ដើម្បីឱ្យកីឡាករបានត្រៀមខ្លួនរៀបចំក្នុងការចូលកងប្រកួត។

លោក ចែម តារា ប្រធានសហព័ន្ធកីឡាបេស្បបល សុហ្វបលកម្ពុជា- Cambodia Baseball Softball Federation បានបង្ហាញក្ដីរំភើបចំពោះការចូលរួមសហការយ៉ាងកក់ក្ដៅពីសំណាក់គ្រប់បណ្ដា Sponsors ទាំងអស់ដែលបានចូលរួមលើកស្ទួយ គាំទ្រវិស័យកីឡា បេស្បបលក្នុងប្រទេសកម្ពុជា ឱ្យកាន់តែមានសកម្មភាព និង ឈានឡើងពីមួយកម្រិតទៅមួយកម្រិតទៀត។

សហព័ន្ធកីឡាបេស្បលហ្វាយកម្ពុជា បើក និង បិតការប្រកួតមិត្តភាពយ៉ាងកក្រើកផ្សារទំនើបK-Mall

សំណព្វ — Sun, 21 Jul 2024 19:44:10 +0000

កាលពីថ្ងៃទី២១ កក្កដា ឆ្នាំ២០២៤ សហព័ន្ធកីឡាបេស្បលហ្វាយកម្ពុជា បានបើកការប្រកួតយ៉ាងអធឹកអធមនៅផ្សារទំនើប K-Mall ដោយមានវត្តមានភ្ញៀវកិត្តិយស អ្នកទស្សនា និង សិល្បករសិល្បការិនីយ៉ាងច្រើនកុះករចូលរួម។ ការប្រកួតនេះ គឺដើម្បីផ្សព្វផ្សាយ អោយកាន់តែមានការស្គាល់ និង ដឹងពីកីឡាបេស្បលហ្វាយ ដែលកម្ពុជាទើបតែបង្ហាញរូបរាង និង ដើម្បីអោយមានការគាំទ្រក្នុងស្រទាប់មហាជន ជាការលើកទឹកចិត្តដល់កីឡាករ និង កីឡាការិនីអោយផុសផុល។

លោក ឆែម ដារ៉ា ប្រធានសហព័ន្ធ បានលើកឡើងថា នេះគឺជាបេសកកម្មប្រកួតមិត្តភាព ដើម្បីបំផុស និង ផ្សព្វផ្សាយដល់កីឡាបេស្បលហ្វាយ ហើយលោកពិតជាបង្ហាញនូវមោទនភាព ដែលការប្រកួតនៅផ្សារទំនើប K-Mall នេះ កាន់តែមានការគាំទ្រខ្លាំងឡើង ហើយក៏សម្ដែងនូវការអរគុណផងដែរ ដែលសិល្បករគ្រួសារតារាកម្ពុជា បានចូលរួមផ្សព្វផ្សាយ និង ជាការលើកទឹកចិត្ត អោយយុវវ័យក្នុងវិស័យបេស្បលហ្វាយ កាន់តែស្រលាញ់កីឡា។ លោកក៏អរគុណផងដែរ ដល់ដៃគូស្ពុនស័រ ដែលជួយការប្រកួតមួយនេះ តាមរយះគ្រួសារតារាកម្ពុជា ដែលអាចអោយសហព័ន្ធមានលទ្ធភាពរៀបចំការប្រកួត និង មានលទ្ធភាពផ្ដល់ជារង្វាន់ដល់អ្នកឈ្នះ។ លោកក៏ថ្លែងអំណរគុណផងដែរ ដល់ផ្សារទំនើប K-Mall ដែលផ្ដល់ទីតាំងអោយរៀបចំ ដែលនេះគឺជាការរួមចំណែកដ៏ធំ ក្នុងការបំផុស និង ផ្សាយអោយស្គាល់ថា អ្វីទៅជាកីឡាបេស្បលហ្វាយ។

លោក ផាត់ តារារដ្ឋ ស្ថាបនិកគ្រួសារតារាកម្ពុជា អ្នកដឹកនាំសិល្បករប្រមាណ៣០នាក់ អោយទៅចូលរួមគាំទ្រ និង បានគៀងគរម្ចាស់ជំនួយមួយចំនួនអោយផ្ដល់ជាស្ពុនស័រជួយដល់កម្ពុជា បានលើកឡើងថា បេស្បលហ្វាយ គឺជាកីឡាថ្មី ដែលទើបតែមានវត្តមាននៅក្នុងប្រទេសកម្ពុជា ហើយនេះគឺជាកីឡាតែមួយគត់ ដែលក្នុងពេលលេង មានប្រុស៣នាក់ស្រី២នាក់ ដែលបង្ហាញពីសមភាពយេនឌ័រ ដែលជាមូលហេតុដែលគ្រួសារតារាកម្ពុជា ចូលរួមជ្រោមជ្រែង។ លោកក៏ថ្លែងអំណរគុណដល់ស្ពុនស័រទាំងអស់ ដែលជួយសហព័ន្ធតាមរយះរូបលោក ដែលកម្លាំងចូលរួមទាំងនេះ គឺសុទ្ធតែជាការជំរុញដ៏ធំ លើកទឹកចិត្តដល់កីឡាករ ។

គួរបញ្ជាក់ផងដែរ កម្មវិធីប្រកួតដែលបានធ្វើឡើងនេះ ក្រៅពីមានការផ្ដល់ទីតាំងដោយផ្សារទំនើប K-Mall ក៏មានការស្ពុនស័រយ៉ាងពិសេស ដោយក្រុមហ៊ុនសាប៊ូកក់សក់ Jensssy ដោយលោកស្រី កែវ ម៉ានិច ក៏បានផ្ដល់នូវឈុតសាប៊ូ ជារង្វាន់លើកទឹកចិត្តដល់ក្រុមអ្នកឈ្នះក្នុងមួយឈតផងដែរ។ ការប្រកួតទាំងមូល ក៏កើតពីការចូលរួមស្ពុនស័រ ដោយមជ្ឈមណ្ឌលកែសម្ផស្ស សាយរះ នៅក្បែរផ្សារត្រពាំងថ្លឹង, ដោយលោកជំទាវ រីយ៉ាត្រាណេ សមាជិកគ្រួសារតារាកម្ពុជា, ដោយណារ៉ាបាយឆាក្ដាម របស់លោក Van Thou, ដោយលោកជំទាវឧកញ៉ា កាំង ហ្គិចសៀម, ដោយចុងភៅចិនសួង ដោយ Pasta Corner និង សារព័ត៌មាន ផ្ទះតារា។

ចូលរួមបើកការប្រកួត កីឡាវាយកូនបាល់ DAVIS CUP ពិភពលោក

សំណព្វ — Wed, 10 Jul 2024 08:38:49 +0000

កាលពីព្រឹកថ្ងៃទី១០ ខែកក្កដា ឆ្នាំ២០២៤ ការប្រកួតកីឡាវាយកូនបាល់ DAVIS CUP Asia/Oceania Group IV ឆ្នាំ២០២៤ ដែលជាការប្រកួតវាយកូនបាល់កម្រិតពិភពលោក ត្រូវបានប្រកាសបើកយ៉ាងអធឹកអធម នៅពហុកីឡដ្ឋានជាតិមរតកតេជោ ក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ។ នៅក្នុងពិធីនោះ ប្រធានកណ្ដាលផែនជ័យឧត្តម លោកស្រី សួ ស្រីម៉ី និង លោក ប៉ាវ គីមសាន អនុប្រធានប្រចាំការកណ្ដាលផែនជ័យឧត្តម ក៏បានចូលរួមដឹកនាំសមាជិកសមាជិក ស.ស.យ.ក នៃផែនគ្រួសារតារា ក្រោមការដឹកនាំរបស់លោក ផាត់ តារារដ្ឋ ស្ថាបនិកគ្រួសារតារាកម្ពុជា ទៅចូលរួមប្រមាណ១០រូបផងដែរ ដែលសុទ្ធតែជាសមាសភាពសំខាន់ៗក្នុងផែន។

លោក ផាត់ តារារដ្ឋ ប្រធានផែនគ្រួសារតារា ដែលចំណុះអោយកណ្ដាលផែនជ័យឧត្តម បានលើកឡើងថា នេះគឺជាការប្រកួតវាយកូនបាល់លំដាប់ពិភពលោក ដែលកម្ពុជាធ្វើជាម្ចាស់ផ្ទះ ដោយមានបណ្ដាប្រទេសជាច្រើនដូចជា ប្រទេសអ៊ីរ៉ាក់ មីយ៉ាន់ម៉ា ស្រីលង្ការ ជាដើមចូលរួមប្រកួតប្រជែង។ វត្តមានរបស់សិល្បករក្នុងផែនគ្រួសារ ក្រោមការចំណុះអោយកណ្ដាលផែនជ័យឧត្តម ក៏ចាត់ទុកថា គឺជាការចូលរួមបំផុសវិស័យកីឡាផងដែរ ស្របពេលដែលសិល្បករម្នាក់ៗ រាល់ការចូលរួមសកម្មភាពរបស់សសយក ក៏តែងតែបំផុស និងចែកចាយ នូវព័ត៌មានផ្សេងៗ អោយកាន់តែមានការគាំទ្រ។ លោកក៏ចាត់ទុកថា សមាសភាពសិល្បករក្នុងផែនទាំងមូល គឺជាចលករដ៏ខ្លាំងរបស់កណ្ដាលផែនជ័យឧត្តម ដែលចំណុះអោយសសយក រាជធានីភ្នំពេញទាំងមូលផងដែរ។

សូមជម្រាបជូនថា ព្រឹត្តិការណ៍ដែលកម្ពុជាទទួលបានសិទ្ធិ ធ្វើជាម្ចាស់ជាប្រវត្តិសាស្ត្រនេះដំណើរការទៅ ចាប់ពីថ្ងៃទី១០ ដល់ថ្ងៃទី១៣ ខែកក្កដា ឆ្នាំ២០២៤ និងមានប្រទេសចូលរួមសរុបចំនួន០៨ រួមមាន៖ ម្ចាស់ផ្ទះកម្ពុជា គុយវ៉ែត កៀហ្ស៊ីស៊ីស្ថាន អ៊ីរ៉ាក់ មីយ៉ាន់ម៉ា ស្រីលង្កា កាតា និងអារ៉ាប់រួម។

កីឡាករជម្រើសជាតិវាយកូនបាល់ចូលរួមសរុបចំនួន ០៥រូប ក្នុងនោះកីឡាករ០២រូប មកពីក្រសួងមហាផ្ទៃ រួមមាន៖
១. កីឡាករ ប៊ុន កេន្នី
២. កីឡាករ ទេព ទីម៉ូធី

ខ្លាំងប៉ះខ្លាំង ប្រដាល់គុនខ្មែរគូអន្តរជាតិនៅសង្វៀនប៉ុស្តិ៍លេខ5 សប្ដាហ៍នេះវាយយកចាញ់ឈ្នះពីរគូរស្មើរដៃគ្នា

សំណព្វ — Tue, 09 Jul 2024 05:28:18 +0000

ចាត់ទុកថាជាសប្ដាហ៍មួយដ៏កម្រលើសង្វៀន គុនខ្មែរប៉ុស្តិ៍លេខ5 បើកឆាកនាដើមខែថ្មី កក្កដានេះ គូប្រកួតជម្រើសអន្តរជាតិ 4គូរប៉ះគ្នាខណៈកីឡាករមកពីប្រទេសចិន និង ប្រទេសថៃសរុបចំនួន 4រូបប៉ះគ្នាជាមួយនឹង កីឡាករជម្រើសប្រចាំប្រទេកម្ពុជា អាចយកជ័យជម្នះស្មើរដៃគ្នាដោយខាងកីឡាករបរទេសវាយផ្ដាច់ឈ្នះកីឡាករខ្មែរ2គូ រីឯ កីឡាករកម្ពុជាយើងវិញអាចផ្ដួលគូប្រកួតនិងទទួលបានជ័យជម្នះ2គូស្មើរគ្នា។

នេះគឺជារូបភាពថ្មីមួយទៀយហើយថ្វីបើការប្រកួតតែតែមានចាញ់ និង ឈ្នះ ប៉ុន្តែសម្រាប់សង្វៀនប៉ុស្តិ៍លេខ5 ត្រូវបានគេកត់សម្គាល់ឃើញថា កម្រនឹងមានកីឡាករមកពីប្រទេសជិតខាងយកឈ្នះកីឡាករខ្មែរបានជាញឹកញយនៅលើសង្វៀននោះឡើយ។ យ៉ាងណាមិញ គូឯកប្រចាំកម្មវិធី កីឡាករ អ៊ូច ធារិទ្ធ បានធ្វើឱ្យអ្នកទស្សនាផ្ទាល់ស្រែកខ្ទរសង្វៀនព្រែកកំពឹស ដោយកីឡាកររូបនេះបានផ្ដួលកីឡាករចិនឱ្យសន្លប់នៅត្រឹមទឹកទី2 ក្នុងប្រទេទប្រដាល់ហ្គង់ចេញម្រាម ប្រភេទទម្ងន់60 Kg បានអង្រួនសង្វៀនជាថ្មីដោយ និង បញ្ចប់ទៅដោយរលូនជាមួយនឹងឈុតឆាកប្រយុទ្ធយ៉ាងគួរឱ្យទាក់ទាញ។

គួររំឮកឡើងវិញថា4គូប្រកួតលក្ខណៈអន្តរជាតិក្នុងនោះរួមមាន៖
គូអន្តរជាតិទី1 កម្ពុជា-ថៃ ថ្វីបើកីឡាករថៃទើបតែប្រកួតលក្ខណះអំបោះឆៅជាលើកទី1 តែក៏ទទួលបានជ័យជំនះលើ ណង សាវ ដោយពិន្ទុ ក្នុងជំនួបលើកដំបូង។

រីឯងគូអន្តរជាតិ កម្ពុជា-ចិន កីឡាករ ឃួន ឡាំងកូស៊ីន ក៏បានចាញ់ក្រោមដៃរបស់កីឡាករ ជាង ឆឹងប៉ាវ (ចិន) ដោយកម្ពុជាបោះបង់ការប្រកួតត្រឹមទឹកទី3ក្នុងប្រភេទកីឡា ឃីក បុកស៊ីង។

ចំណែកគូអន្តរជាតិទី3 កម្ពុជា-ចិន (អំបោះឆៅ) កីឡាករខ្មែរ ជុន ស៊ឹមប៊ុន បានយកឈ្នះកីឡាករសក់វែងមកពីប្រទេសចិន ចាង យ៉ាងឡុង ។

ងាកមកគូឯកចុងក្រោយ កម្ពុជា-ចិន ( ហ្គង់ចេញម្រាម) ដដែល ដោយកីឡាករ អ៊ូច ធារិទ្ធ ធ្វើបានល្អតាំងពីទឹកទីមួយ ស្នៀតប្រយុទ្ធពោពេញដោយកម្លាំងថាមពល និង ប្រើក្បាច់ពិសេសៗផ្ដួលគូប្រកួត ហ័រ ជីនចាវ ឱ្យដួលក្រោកមកតតាំងទាំងស្មារតីមិននឹងន៎ ហើយត្រូវបានអាជ្ញាកណ្ដាល់បហរើឆន្ទានុសិទ្ធសម្រេចឱ្យផ្អាកការប្រកួតភ្លាមៗតែម្ដង។

ជារៀងរាល់សប្ដាហ៍សហព័ន្ធកីឡាប្រដាល់គុនខ្មែរ និង ស្ថានីយ៍ទូរទស្សប៉ុស្តិ៍លេខ5 តែងតែសម្រិតសម្រាំងនាំមកជូនទស្សនិកជនរហូតទៅដល់7គូ ទាំងជាតិ និង អន្តរជាតិឱ្យអ្នកស្នេហាវិស័យកីឡាបានទស្សនាឱ្យបានជក់ចិត្ត និង ពេញភ្នែក។

គួរបញ្ជាក់ផងដែរថា ប្រដាល់គុនខ្មែរប៉ុស្តិ៍លេខ5 នឹងធ្វើការផ្អាកមួយសប្ដាហ៍ ដូច្នេះសម្រាប់បងប្អូនដែលស្នេហាវិស័យកីឡាអាចរង់ចាំតាមដានទស្សនា នាសប្ដាហ៍ក្រោយនៅថ្ងៃ សៅរិ៍ ទី 27 ខែកក្កដា ជាថ្មីម្ដងទៀត។ សម្រាប់ព័ត៌មានលម្អិតលោកអ្នកអាចរង់ចាំតាមដាននៅលើកញ្ចក់ទូរទស្សន៍ប៉ុស្តិ៍លេខ5 ឬ Facebook Page ផ្លូវការ TV5 Cambodia ដើម្បីទាតួលបានតំណឹងពីការចាប់គូ និង វត្តមានកីឡាករណាខ្លះនឹងមកប្រកួតនៅលើសង្វៀនក្រោយៗ។

សហព័ន្ធកីឡាបេស្បល សុហ្វបលកម្ពុជា ប្រកាសសន្និសីទពីការប្រកួតថ្នាក់ជាតិ

សំណព្វ — Sun, 30 Jun 2024 14:38:51 +0000

កាលពីព្រឹកថ្ងៃអាទិត្យ ទី៣០ ខែមិថុនាឆ្នាំ២០២៤ លោក ឆែម តារា ប្រធានសហព័ន្ធកីឡាបេស្បល សុហ្វបលកម្ពុជា បានបើកសន្និសីទធំមួយ អមដោយការធ្វេីកិច្ចចុះអនុស្សរណៈយោគយល់គ្នា (MOU) ជាមួយដៃគូសហការ ចំនួន២ គឺជាមួយ លោកស្រី Chariya Chea ស្ថាបនិក និង ជាអគ្គនាយិកាក្រុមក្រុមហ៊ុន A2Z SOLUTION និង ជាមួយលោក ផាត់ តារារដ្ឋ ស្ថាបនិកគ្រួសារតារាកម្ពុជា និង ចាងហ្វាងសាព័ត៌មាន ផ្ទះតារា Home Stars ដើម្បីប្រកាសថា នៅអំឡុងចុងខែ៨ខាងមុខ សហព័ន្ធនឹងបើកការប្រកួត Baseball 5 ធំមួយ ដោយសហព័ន្ធស្នើសុំអោយដៃគូសហការថ្មី គឺ លោកស្រី ជា ចរិយា និង លោក ផាត់ តារារដ្ឋ ចូលរួមសហការផ្សព្វផ្សាយ ក៏ដូចជាស្វែងរកដៃគូឧបត្ថម្ភគាំទ្រថវិការ ដេីម្បីអភិវឌ្ឍន៍ទៅលេីវិស័យ កីឡាបេស្បល សុហ្វបល បេស្បលហ្វាយកម្ពុជា អោយកាន់តែមានភាពរីកចំរេីនទៅមុខកាន់តែខ្លាំង ទាំងលេីឆាកជាតិ និងអន្តរជាតិ។

គួរបញ្ជាក់ផងដែរ ព្រឹត្តិការណ៍ធំ ដែលសហព័ន្ធគ្រោងនឹងធ្វើនោះ គឺត្រៀមខ្លួនរៀបចណការប្រកួតពានរង្វាន់ #លីគបេស្បលហ្វាយ កម្ពុជា ឆ្នាំ២០២៤ ដែលគ្រោងនឹងរៀបចំនៅថ្ងៃទី២១ ដល់ ២៤ ខែសីហា ឆ្នាំ២០២៤ខាងមុខនេះ។ ព្រឹត្តិការណ៍នេះ ក៏នឹងផ្ដល់អោយម្ចាស់ជំនួញ និង ម្ចាស់អាជីវកម្មតូចធំ ដែលចង់រួមចំណែកជួយដល់កីឡា Baseball 5 បានរួមចំណែកក្នុងនាមជាអ្នកស្ពុនស័រផងដែរ។

គូពិសេសកម្រប្រកួតបែប អំបោះឆៅនៅ TV5 KunKhmer សប្ដាហ៍ចុងក្រោយនៃខែ មិថុនា នេះ កំពែង ខ្មៅ ប៉ះនឹង លីន ជី តស៊ូរហូតដល់3ទឹកពេញ

សំណព្វ — Sun, 30 Jun 2024 00:15:09 +0000

ពីមួយសប្ដាហ៍ទៅមួយសប្ដាហ៍ស្ថានីយ៍ទូរទស្សន៍ប៉ុស្តិ៍លេខ5 សហការណ៍ជាមួយនឹង សហព័ន្ធកីឡាប្រដាល់គុនខ្មែរ តែងតែនាំយកនូវគូប្រកួតលំដាប់ទាំងជាតិ និង អន្តរជាតិមកបង្ហាញលើសង្វៀន TV5 គុនខ្មែរ មានគ្រប់រសជាតិនៃការប្រកួតទាំង គុនខ្មែរប្រភេទ ហ្គង់ធម្មតា ហ្គង់ចេញម្រាម ពិសេសគឺមិនដែលរំលងការប្រកួតបែបអំបោះឆៅនោះឡើយមួយរយៈចុងក្រោយនេះ។

ចាត់ទុកថាជាគូដ៏កម្រនៅលើសង្វៀន TV5 គុនខ្មែរ ខណៈឆ្លងកាត់គូប្រកួតបែបអំបោះឆៅជាច្រើនគូមកហើយកាលពីសប្ដាហ៍មុនៗ ប៉ុន្តែគ្មានមួយគូណាដែលអាចឈានដល់ទឹកទី3ពេញនោះឡើយដោយសារឧបករណ៍បំពាក់របស់ការប្រកួតក្នុងទម្រង់អំបោះឆៅ គឺឆាប់ទទួលរងនូវរបួស និង គ្រោះថ្នាក់ដែលទាមទាឱ្យកីឡាករនីមួយៗត្រូវតែប្រុងប្រយ័ត្ន ទាំងការគេច និង ជំហររបស់ខ្លួន ជាហេតុការប្រកួតបែអំបោះឆៅភាគច្រើនគឺមិនងាយនឹងចប់ទឹកនោះឡើយ។

ប៉ុន្តែគូពិសេសរវៀង កំពែង ខ្មៅ ប៉ះនឹង លីន ជី បានបំបែកកំណត់ត្រាថ្មីលើសង្វៀន TV5 ដោយប្រកួតស្ទើមិនដកដៃរហូតពិធីករអាត្ថាធិប្បាយសឹងមិនទាន់ ប៉ុន្តែគូនេះស៊ូរហូតបានចប់ទឹកស្រេចបាច់ស្ទើរមិនគួរឱ្យជឿ និង នៅតែរក្សាបាននូវជំហររឹងមាំរៀងៗខ្លួនហាក់មិនទាន់អស់ចិត្តចង់បន្តការប្រកួតបន្តទៀត។

ជាលទ្ធផលនៅក្នុងការប្រកួតយ៉ាងស្វិតស្វាញនេះបង្គោលខៀវ លីន ជី បានយកឈ្នះ កំពែងខ្មៅដោយពិន្ទុនៅក្នុងការប្រកួតបែបអំបោះឆៅ ប្រកួតក្នុងប្រភេទទម្ងន់ 63.5Kg កាលពីថ្ងៃទី 29 ខែ មិថុនា ឆ្នាំ2024នេះ។ គួររំឮកឡើងវិញថា កីឡាករ លីន ជី មកពីក្លឹប បូរីរាជសីហ៍មានឬទ្ធ របស់សមាគមកីឡាកងយោធពលខេមរភូមិន្ទ។

សង្កេតឃើញថា សង្វៀន TV5 គុនខ្មែរ ក្រៅពីនាំយកនូវគូប្រកួតជើងខ្លាំងបែបមិត្តភាពពិសេសៗ មិនតែប៉ុណ្នោះ ក៏តែងតែផ្ដល់ឱកាសឱ្យថ្នាលកីឡាករគុនខ្មែរដែលជាយុវជនជំនាន់ក្រោយមកបញ្ចេញកម្លាំងនៅលើសង្វៀនជារៀងរាល់សប្ដាហ៍ដើម្បីបណ្ដុះ ពង្រឹង និង ដុះខាត់សមត្ថភាពព្រមទាំងបទពិសោធន៍ឱ្យកាន់តែខ្លាំង។ សម្រាប់ព័ត៌មានគូប្រកួតនៅសប្ដាហ៍ក្រោយៗនេះទស្សនិកជនអាចរង់ចាំតាមដាននៅលើ Facebook ផ្លូវការណ៍ ឬ តាមកញ្ចក់ទូរទស្សន៍ TV5 Cambodia បានដើម្បីទទួលបានដំណឹងកាន់តែច្បាស់។