យោងតាមការបង្ហោះមុននេះ លើផេក Siv Mey Online Shop របស់លោកជំទាវឧកញ៉ា អ៊ាន សៀវម៉ី លោកជំទាវបានបង្ហោះថា”ខ្ញុំព្រះករុណាខ្ញុំ សូមក្រាបថ្វាយបង្គំ និង គោរពជំរាបសួរដល់ ព្រះសង្ឃគ្រប់ព្រះអង្គ និង ពុកម៉ែ ពូមីង បងប្អូនជនរួមជាតិទាំងអស់គ្នា ដោយសេចក្តីនឹករលឹកជាខ្លាំង។ ដោយហេតុថា មានការរីករាលដាលយ៉ាងខ្លាំងនៃជំងឺខូវីត១៩ ក្នុងព្រឹត្តិការសហគមន៍ ២០កុម្ភះ បានធ្វើអោយមានការឆ្លងកើនឡើងយ៉ាងច្រើន រហូតដល់មានអ្នកបាត់បង់ជីវិតទៀតផង ដោយឃើញពីការខិតខំប្រឹងប្រែងយ៉ាងសកម្មរបស់ អាជ្ញាធរគ្រប់លំដាប់ថ្នាក់ និង ផលប៉ះពាល់ដល់ប្រជាពលរដ្ឋក្នុងការប្រយុទ្ធប្រឆាំងនឹងជំងឺខូវីត១៩ នេះ និង ដើម្បីជួយចូលរួមចំណែក ជាមួយរាជរដ្ឋាភិបាលកម្ពុជា ក្នុងនាមនាងខ្ញុំជាម្ចាស់ ផ្សារ និង បន្ទប់ជួល ដែលមានចំនួន ១៦៣ តូប បូករួមទាំងបន្ទប់ ដែលមានកំរៃថ្លៃជួលសរុប ៦១៣០$ ក្នុង១ខែនោះ នាងខ្ញុំនឹងមិនយកថ្លៃជួលតូប និង បន្ទប់ រយៈពេល៣ខែ គឺចាប់ពីខែមេសា ដល់ ខែ មិថុនា ឆ្នាំ២០២១ ។
ដូច្នេះសូមបងប្អូនមេត្តាជ្រាបជាដំណឹង ហើយនិង សូមជួយចូលរួមគោរពតាមការណែនាំ និង វិធានការ របស់ក្រសួងសុខាភិបាលអោយបានម៉ត់ចត់ ជាពិសេស គោរពតាមការណែនាំរបស់ប្រមុខរាជរដ្ឋាភិបាលគឺ សម្តេចតេជោ ហ៊ុន សែន គឺ ៣ការពារ និង ៣កុំ អោយបានមុឺងម៉ាត់។
សូមប្រទានពរ និង គោរពជូនពរ ដល់ព្រះសង្ឃគ្រប់ព្រះអង្គ និង ពុកម៉ែ ពូមីង បងប្អូន ជនរួមជាតិទាំងអស់ ទទួលបាននូវ សំណាងល្អ សុខភាពល្អបរិបូរណ៍ និង ជៀសឆ្ងាយពីជំងឺនានា សូមអរព្រះគុណ និង គោរពអរគុណ អំពីខ្ញុំព្រះករុណាខ្ញុំ ឩកញ្ញា អ៊ាន សៀវមុី🙏🙏🙏”។
ការបង្ហោះរបស់លោកជំទាវបានធ្វើអោយមានការសរសើរយ៉ាងខ្លាំង ជាពិសេសនៅក្នុងកាលៈទេសៈ ដែលប្រជាជនកម្ពុជាកំពុងជួបផលវិបាកបែបនេះ។ ការប្រកាសរបស់លោកជំទាវក៏ប្រាកដជានឹងធ្វើអោយ អ្នកលក់ដូរជួលតូបផ្សារទាំងអស់របស់លោកជំទាវ និងអ្នកជួលបន្ទប់សប្បាយត្រេកអរផងដែរ ខណៈដែលថ្លៃឈ្នួលក្នុងមួយខែៗដែលលោកជំទាវសម្រេចចិត្តមិនយកនាពេលនេះ គឺជាចំនួនច្រើន៕
