កាលពីព្រឹកថ្ងៃទី២៨ សីហា ឆ្នាំ២០២៤ ម្ចាស់ប្រេនសាប៊ូកក់សក់ Jensssy លោកស្រី កែវ ម៉ានិច បានរៀបចំពិធីក្រុងពាលីយ៉ាងអធឹកអធម នៅទឹកដីស្រុកព្រះស្ដេច ខេត្តព្រៃវែង ដែលស្ថិតនៅមិនឆ្ងាយពីច្រកអន្តរជាតិបន្ទាយចក្រី ព្រំដែនវៀតណាម។
នេះជាភាពយន្តខ្នាតធំ រឿង ភូមិយាយម៉ប ដែលលោកស្រីបានបោះទុនផលិត ហើយសហការជាមួយផលិតកម្មមួយ ក្រោមការដឹកនាំរបស់ផលិតករលោក ពិសិដ្ឋ ចាន់រ៉ា។ ភាពយន្តនេះ គម្រោងផលិតដាក់បញ្ចាំងគ្រប់រោង ដោយគ្រានតែឃើញទីតាំងថត ក៏ដឹងថាចំណាយអស់ច្រើន ព្រោះត្រូវបានកែច្នៃជាស្ពាន ជាផ្សារ និង ជាផ្ទះបែបបុរាណ ដើម្បីអោយស៊ីនឹងសាច់រឿងក្នុងសម័យលង្វែក។
ក្រឡេកទៅមើលតួសម្ដែងវិញក៏ដឹងថាមិនពិបាកទទួលការគាំទ្រផងដែរ ដោយសារតែលោកស្រីជ្រើសសុទ្ធតែតារាល្បីៗ មកសម្ដែង ដូចជា អ្នកស្រី សច័ន្ទ ដានី លោក សំនៀង ពូណុយ ងួន សុបិន្ត លោកសាន់តា លោក សម សារី លោក ផាត់តាភូ ម៉ែវឿន និង តារាល្បីៗជាច្រើនរូបទៀត។ លោកស្រី កែវ ម៉ានិច បង្ហើបថា មួយរឿងនេះបោះទុនផលិតអស់ក្រែល ហើយបើរឿងនេះទទួលបានជោគជ័យ នោះលោកស្រីនឹងបន្តផលិតទៀត ដើម្បីវាយលុកទីផ្សារភាពយន្តក្នុងរោង និង ក្រៅប្រទេស ក៏ដូចជាដើម្បីចូលរួមលើកស្ទួយវិស័យភាពយន្តខ្មែរ និង វប្បធម៌ខ្មែរ។
