កាលពីថ្ងៃទី 05 ខែ មករា ឆ្នាំ 2025 ថ្មីៗនេះ លោក សោម បឿន ដែលជានាយកសាលា បឋមសិក្សា សឡា បានមូលមតិគ្នាជាមួយនឹងលោកគ្រូអ្នកគ្រូក្រោមបន្ទុក រៀបចំនូវកម្មវិធីបុណ្យផ្កាមហាសាមគ្គី ក្នុងគោលបំណងរៃអង្គាសថវិកា និង ស្វែងរកជំនួយពីសំណាក់មាតាបិតាដែលជាអាណាព្យាបាលរបស់សិស្សានុសិស្ស និង សប្បុរសជនជិតឆ្ងាយ ដើម្បីប្រមូលថវិការទិញតុចំនួន 600 សម្រាប់ផ្ដល់ជូនសិស្ស បានអង្គុយសិក្សាបានកាន់តែងាយស្រួលជាងមុន បន្ទាប់ពីអាត្រានៃកំណើនសិស្សទាំងប្រុសទាំងស្រីពីមួយឆ្នាំទៅមួយឆ្នាំកាន់តែច្រើនឡើងៗ។
ក្នុងនោះផងដែរថវិការដែលទទួលបានពីការធ្វើបុណ្យផ្កា និង ការចូលរួមពីសំណាក់លោកគ្រូអ្នកគ្រូ និង អាណាព្យាបាលសិស្ស រួមទាំងឯងឧត្តមលោកជំទាវដែលបានចូលរួមតាមសទ្ធាជ្រះថ្លារ លោកនាយកក៏បានត្រៀមនឹងរៀបចំជួសជុលនូវគ្រឿងបរិក្ខារផ្សេងៗ ដូចជារបង និង ជួសជុលសម្ភារៈមួយចំនួនសម្រាប់បម្រើការឱ្យលោកគ្រូអ្នកគ្រូ ដែលនៅអាចប្រើការបាន និង រៀបចំនូវសួនច្បារថ្មីដើម្បីបន្ថែមនូវសោភ័ណ្ឌភាពក្នុងបរិវេណសាលា។
នៅក្នុងដំណើរការនៃកម្មវិធីបុណ្យផ្ការស្មីសាមគ្គីនេះផងដែរ គេឃើញត្រូវបានបំផុសដោយលោក DJ Cake ដែលត្រូវបានគេស្គាល់ថាជា តារារ៉េប ដ៏ល្បីប្រចាំនៅប្រទេសកម្ពុជាយើង។ នេះគឺជាចលករមួយដែលជម្រុញឱ្យមានអ្នកដឹង និង ជ្រាបកាន់តែច្បាស់ពីតម្រូវការដែលសាលា បឋមសិក្សា សឡា ត្រូវការចាំបាច់ និង ជាផ្នែកមួយដែលអាចគៀងគរនូវជំនួយបានមួយផ្នែកផ្សេងទៀតរួមគ្នាជួយឱ្យសាលាកាន់តែមានការវិវត្តន៍ទៅមុខឈានបានមួយកម្រិតទៀត។
